Norwegian flag
Utredningen som riktar sig till hälso- och sjukvårdspersonal, har utformats utefter tillgänglig litteratur och resurser vid tidpunkten för utredning. Innehållet i utredningen uppdateras inte. Hälso- och sjukvårdspersonal är ansvarig för hur de använder informationen vid rådgivning eller behandling av patienter.


Interaksjonar mellom marevan, sotalol og valerianarot



Fråga: Lege har ein 70-årig mannleg pasient med paroksystisk atrieflimmer behandla med warfarin (Marevan), og elles sotalol som fast medisin. Pasienten ønskjer å forsøke valerianarot (Valerina Natt/Valerina Forte) mot søvnvanskar. Legen ønskjer å vite om det finst interaksjonar mellom valerianarot og pasienten sine faste legemiddel?

Svar: Valerianarot finst tilgjengeleg i produkta Valerina Natt og Valerina Forte, og det er ikkje spesifisert kva for eit av dei to preparata pasienten ønskjer å forsøke. Valerina Natt er eit tradisjonelt plantebasert legemiddel som i tillegg til valerianarot òg inneheld humleblomst og sitronmelisseblad. Valerina Forte inneheld berre valerianarot som virkestoff og er eit veletablert plantebasert legemiddel. Effekten av valerianarot utviklar seg gradvis over tid, og preparata er derfor ikkje eigna som akutt behandling av søvnvanskar (1, 2a, b).

Tradisjonelle og veletablerte plantebaserte legemiddel er av Statens legemiddelverk underlagt dokumentasjonskrav til kvalitet, tryggleik, effekt og lang tids bruk. Dette i motsetnad til andre naturmiddel, som klassifiserast som kosttilskot og ikkje er underlagt noko godkjenningsordning. Det finst likevel avgrensa kunnskap om farmakokinetiske og farmakodynamiske interaksjonar for desse preparata (1, 2a, b).

Interaksjonspotensial mellom pasienten sine legemiddel og valerianarot, humleblomst og sitronmelisseblad
Ved søk i relevante interaksjonsdatabasar, får vi ikkje treff på interaksjonar mellom virkestoffa i Valerina Natt eller Valerina Forte og pasienten sine legemiddel (3-5). Fråvere av funn utelukker likevel ikkje at uheldige effektar kan oppstå ved samtidig bruk.

Warfarin er eit racemat, der S-warfarin er meir potent enn R-warfarin. S-warfarin metaboliserast hovudsakeleg av CYP2C9 og R-warfarin av CYP1A og CYP3A4 (2c). Sotalol metaboliserast ikkje i lever, og utskiljast uforandra i urinen (2d).

In vitro studier har rapportert motstridande resultat for om valerianarot kan indusere eller hemme CYP3A4. Potensielle effektar av valerianarot på CYP3A4 blir i utgangspunktet ikkje rekna som klinisk relevante, men høge dosar (1000 mg dagleg) er rapportert å kunne gi ei beskjeden hemming av CYP3A4. Ein rådar derfor til varsemd hos pasientar som bruker legemiddel som i hovudsak metaboliserast av CYP3A4 (6a, 7a). Då bruk av valerianarot for søvn er tilrådd som fast behandling over ein periode, vil det vere tilrådeleg å auke frekvensen av INR-målingar om ein vel å starte behandling med valeriana-preparat.

In vitro studier og dyrestudier har vist at humleblomst kan hemme CYP1A-enzym og indusere CYP3A4. Det er ikkje observert klinisk relevante interaksjonar hos menneske (6b, 7b). Ein har ikkje informasjon om at sitronmelisse påverker CYP-enzym (6c, 7c).

VURDERING
Ved søk i interaksjonsdatabasar finn vi ingen kjente interaksjonar mellom valerianarot og pasienten sine faste legemiddel, men grunna avgrensa kunnskapsgrunnlag kan uheldige effektar likevel ikkje utelukkast. Monografiar av virkestoffa oppgir at potensielle effektar på CYP-enzym ikkje ventast å vere klinisk relevante. Det finst likevel ein teoretisk mulegheit for at valerianarot kan hemme CYP3A4 og dermed forsterke effekten av warfarin. Då warfarin har eit smalt terapeutisk vindauge, bør ein derfor vise varsemd eller unngå denne kombinasjonen.

Referenser:
  1. Statens legemiddelverk. Markedsføringstillatelse for plantebaserte legemidler. http://www.legemiddelverket.no/(Sist oppdatert: 15. august 2016).
  2. Statens legemiddelverk. Preparatomtale (SPC) a) Valerina Natt (Sist oppdatert: 11. mai 2016), b) Valerina Forte (Sist oppdatert: 11. mai 2016), c) Marevan (Sist oppdatert: 25. juli 2016), d) Sotalol (Sist oppdatert: 10. november 2008). http://www.legemiddelsok.no/
  3. Statens legemiddelverk. Interaksjonssøk. http://www.legemiddelsok.no/sider/Interaksjoner.aspx (Søk: 29. september 2016).
  4. Baxter K, Preston CL, editors. Stockleys Herbal Medicines Interactions (online). http://www.medicinescomplete.com/ (Søk: 29. september 2016).
  5. Lexi-Interact in Lexicomp in UpToDate. http://www.helsebiblioteket.no/ (Søk: 29. september 2016).
  6. Baxter K, Preston CL, editors. Stockleys Herbal Medicines Interactions (online). a) Valerian, b) Hops, c) Melissa. http://www.medicinescomplete.com/ (Sist oppdatert: 22. juni 2016).
  7. Natural Medicines Comprehensive Database. a) Valerian (Sist oppdatert: 16. februar 2015), b) Hops (Sist oppdatert: 22. juli 2015), c) Lemon balm (Sist oppdatert: 30. desember 2015). http://www.naturaldatabase.com/