Norwegian flag
Utredningen som riktar sig till hälso- och sjukvårdspersonal, har utformats utefter tillgänglig litteratur och resurser vid tidpunkten för utredning. Innehållet i utredningen uppdateras inte. Hälso- och sjukvårdspersonal är ansvarig för hur de använder informationen vid rådgivning eller behandling av patienter.


Oppbevaring av kloramfenikol augedråpar



Fråga: Ein apotektilsett sjukepleiar lurer på om kloramfenikol augedråpar kan oppbevarast i romtemperatur etter opning? Spørsmålsstillar viser til ei tidlegare RELIS-utgreiing som oppgjev at kloramfenikol augesalve kan oppbevarast i romtemperatur, men det etterspørjast informasjon om oppbevaring i romtemperatur for augedråpane.

Svar: Informasjon om oppbevaring av legemiddel Alle legemiddel skal ha påført informasjon om krav til oppbevaring på pakningen og i pakningsvedlegget (punkt 5). Denne informasjonen finn ein òg under punkt 6.4. i preparatomtalen (SPC), gjerne med ei grunngjeving for særskilte krav til oppbevaring. For dei fleste legemiddel finn ein òg tilsvarande informasjon i Felleskatalogteksten i avsnittet "Oppbevaring og holdbarhet".

Informasjonen om oppbevaring og haldbarheit som oppgjevast i dei nemnte kjeldene, er dei vilkåra som produsenten sjølv har data for og der dei kan garantere for kvaliteten på legemidlet dersom desse følgjast. Legemiddel bør så langt det er mogleg følgje dei oppbevaringsvilkår som er gitt av produsenten, då stabilitet og effekt kan forringast ved andre tilhøve. For legemiddel som i utgangspunktet skal oppbevarast kjøleg, kan oppbevaring i romtemperatur påverke stabiliteten og dermed potensielt den kliniske effekten av legemidla.

Oppbevaring av kloramfenikol augedråpar
Det finst fleire produsentar av kloramfenikol augedråpar, som finst i fleire administrasjonsformer. For Takeda sine augedråpar i tube og for Bausch Health sitt preparat Kloramfenikol Minims eindosepakningar er det oppgjeve at dei skal oppbevarast i kjøleskap (2-8 °C) og skydda mot lys (2a, b).

Santen marknadsfører kloramfenikol augedråpar i tube og i eindosepakningar. For begge gjeld at preparatet skal oppbevarast i kjøleskap (2-8 °C) fram til opning, medan etter opning kan preparatet oppbevarast ved høgst 25 °C i 28 dagar (2c, d).

For øvrig er det òg ulikskapar i oppbevaringsvilkåra for ulike preparat/produsentar av kloramfenikol augesalve (3, 4).

KONKLUSJON
Alle legemiddel har informasjon om oppbevaringsvilkår i preparatomtalen og i pakningsvedlegget. Kvart enkelt preparat må derfor sjekkast kva gjeld informasjon om oppbevaring før og etter opning. Per no er det berre Santen sine augedråpar i tube og eindosepakningar som har oppgjeve at dei kan oppbevarast i romtemperatur (høgst 25 °C i 28 dagar) etter opning.

Referenser:
  1. RELIS database 2013; spm.nr. 3221, RELIS Nord-Norge. (www.relis.no)
  2. Statens legemiddelverk. Preparatomtale (SPC) a) Kloramfenikol Takeda øyedråper (Sist oppdatert: 2. april 2019), b) Kloramfenikol Minims (Sist oppdatert: 27. august 2019), c) Kloramfenikol Santen øyedråper (Sist oppdatert: 27. oktober 2015), d) Kloramfenikol Santen øyedråper, oppløsning i endosebeholder (Sist oppdatert: 27. oktober 2015). https://www.legemiddelsok.no/
  3. Statens legemiddelverk. Preparatomtale (SPC) a) Kloramfenikol Takeda øyesalve (Sist oppdatert: 2. april 2019), b) Kloramfenikol Santen øyesalve (Sist oppdatert: 21. april 2017). https://www.legemiddelsok.no/
  4. Pakningsvedlegg Kloramfenikol Aurora Medical øyesalve. https://www.felleskatalogen.no/ (Sist oppdatert: August 2019).