Norwegian flag
Utredningen som riktar sig till hälso- och sjukvårdspersonal, har utformats utefter tillgänglig litteratur och resurser vid tidpunkten för utredning. Innehållet i utredningen uppdateras inte. Hälso- och sjukvårdspersonal är ansvarig för hur de använder informationen vid rådgivning eller behandling av patienter.


Semaglutid for vektreduksjon



Fråga: Sjukehuslege oppgjev at fleire pasientar lurer på om semaglutid, kjend under preparatnamnet Ozempic, kan takast i bruk som eit middel for vektreduksjon hos personar utan diabetes? Legen viser til at denne behandlinga allereie er implementert i USA, og at ein auker doseringa til 2 mg i veka hos desse pasientane. Er dette ei fornuftig dosering? Bør ein forholde seg til ein viss kroppsmasseindeks (KMI) hos personar utan diabetes som ønskjer legemiddelet? Vanlege biverknader oppgjevast å vere diaré, kvalme og fatigue, men finst det andre langtidsbiverknader hos desse pasientane?

Sammanfattning: Semaglutid (Wegovy) er godkjent behandling for overvekt hos personar utan diabetes, men er foreløpig ikkje tilgjengeleg på den norske marknaden. Informasjon om indikasjon, dosering og biverknader kan finnast i godkjent preparatomtale. Eventuell føreskriving av semaglutid (Ozempic) mot overvekt vil vere utanfor godkjent indikasjon (off-label). Sjølv om behandlande lege har høve til å føreskrive Ozempic off-label, er den anbefalte vedlikehaldsdoseringa for vektreduksjon ikkje mogleg å administrere med Ozempic-pennane.

Svar: Semaglutid for vektreduksjon er nyleg godkjent for den europeiske marknaden under namnet Wegovy, men er foreløpig ikkje marknadsført i Noreg (1). RELIS har ikkje informasjon om når Wegovy eventuelt vil bli tilgjengeleg på den norske marknaden. Det føreligg likevel ein godkjent preparatomtale (SPC) for Wegovy.

Indikasjon og dosering
Preparatomtalen oppgjev at legemiddelet er indisert til pasientar med kroppsmasseindeks (KMI) ≥30 kg/m2 eller ≥27 til <30 kg/m2 ved førekomst av minst éin vektrelatert komorbiditet, som dysglykemi, hypertensjon, dyslipidemi, obstruktiv søvnapné eller kardiovaskulær sjukdom. Legemiddelet skal nyttast som tillegg til diett med redusert kaloriinntak og auka økt fysisk aktivitet for vektkontroll (1).

Den anbefalte doseringa av Wegovy startar med 0,25 mg i veka og aukast vidare til 0,5 mg, 1,0 mg, 1,7 mg og 2,4 mg over ein periode på 16-20 veker. Wegovy-pennane kjem med éin førehandsinnstilt dose tilsvarande dei som er tilrådd i doseringsregimet, og skal berre nyttast éin gong (1).

RELIS har tidlegare skrive om bruk av semaglutid for vektreduksjon hos personar utan diabetes, inkludert doseringsanbefalingar og varsemdsreglar knytta til moglege langtidsbiverknader (2, 3). Her framkjem det òg at føreskriving av semaglutid under namnet Ozempic ikkje er eigna til å administrere dei høgare dosetrinna av semaglutid, som oppgjeve i doseringsanbefalingane for vektreduksjon (1-3). Ozempic-pennane er fleirgongspennar, kjem i styrkane 0,25 mg, 0,5 mg og 1 mg, og inneheld totalt 4 dosar (høvesvis totalt 1 mg, 2 mg og 4 mg semaglutid per penn). Avhengig av styrke på pennen, tillet doseveljaren på Ozempic å velje dosar på 0,25 mg, 0,5 mg og 1 mg (4).

Føreskriving av semaglutid (Ozempic) mot overvekt vil vere utanfor godkjent indikasjon (off-label). Det inneber at den som føreskriv tek på seg eit særleg ansvar når det gjeld å vurdere nytte-risiko-forholdet og oppfølging av pasienten med tanke på effekt og biverknader.

Moglege biverknader
I tillegg gastrointestinale biverknader og fatigue, er hårtap, gallesjukdom, pankreatitt og auke i hjartefrekvens kjende biverknader ved semaglutid-behandling (1).

Potensielle langtidseffektar på kardiovaskulære utkomme i denne pasientpopulasjonen undersøkjast i Semaglutide Effects on Heart Disease and Stroke in Patients with Overweight or Obesity (SELECT)-studien, som forventast avslutta i 2023 (5). Bruk av GLP-1-analogar, inkludert semaglutid, har vist å ha positive effektar på kardiovaskulære utkomme hos pasientar med type 2 diabetes. I ein ekspertoppsummering etterlysast også "real-world studies" kva gjeld langtidseffektar og -biverknader hos overvektige pasientar både med og utan diabetes (5).

I den amerikanske preparatomtalen til Wegovy oppgjevast det at legemiddelet er kontraindisert hos personar med personleg eller familiær historie med medullært tyreoideakarsinom og hos pasienter med multippel endokrin neoplasi type 2. Dette har bakgrunn i semaglutidbehandling i studier på rotter og mus førte til auka førekomst av tyreoide C-celle-tumorar. Førekomsten auka med dosen og behandlingslengda av semaglutid (2, 3, 6). Dette er ikkje oppført som ein kontraindikasjon eller varsemdsregel i den norske preparatomtalen til Wegovy (1).

Referenser:
  1. Statens legemiddelverk. Preparatomtale (SPC) Wegovy. https://www.legemiddelsok.no/ (Publisert: 10. mars 2022).
  2. RELIS database 2021; spm.nr. 6664, RELIS Nord-Norge. (www.relis.no)
  3. RELIS database 2022; spm.nr. 14944, RELIS Sør-Øst. (www.relis.no)
  4. Statens legemiddelverk. Preparatomtale (SPC) Ozempic https://www.legemiddelsok.no/ (Sist oppdatert: 23. februar 2022).
  5. Lau DCW, Batterham RL, le Roux CW. Pharmacological profile of once-weekly injectable semaglutide for chronic weight management. Expert Rev Clin Pharmacol 2022: 1-17.
  6. U.S. Food and Drug Administration (FDA). Drug label information. Wegovy. www.dailymed.nlm.nih.gov/ (Sist oppdatert: 4. juni 2021).