Norwegian flag
Utredningen som riktar sig till hälso- och sjukvårdspersonal, har utformats utefter tillgänglig litteratur och resurser vid tidpunkten för utredning. Innehållet i utredningen uppdateras inte. Hälso- och sjukvårdspersonal är ansvarig för hur de använder informationen vid rådgivning eller behandling av patienter.


Furosemid i subkutan infusjonspumpe



Fråga: Kan furosemid (Furix) blandast saman med morfin, haloperidol (Haldol), midazolam og glykopyrronium (Robinul) i subkutan infusjonspumpe til døyande pasient? Er det vanleg å bruke furosemid i smertepumpe/smerteblanding? Spørsmål frå sjukepleiar.

Svar: OPPSUMMERING
Vi vil fraråde å blande furosemid med morfin, haloperidol, midazolam og glykopyrronium i subkutan infusjonspumpe, sidan vi forventer at ei slik blanding vil vere fysikalsk-kjemisk uforlikeleg. Furosemid er brukt i subkutane infusjonspumper til pasientar med avansert hjertesvikt (off-label-bruk), men RELIS kjenner ikkje til om dette er vanleg praksis i Noreg. Fysikalsk-kjemisk forlikelegheit må alltid undersøkast før ein gjer tilsetningar til parenterale blandingar.

BAKGRUNN
Furosemid (Furix) i subkutan infusjonspumpe
Furosemid er eit slyngediuretikum, og Furix injeksjonsvæske er godkjent til intramuskulær eller intravenøs administrering (1). I eit oppslagsverk som omtalar kontinuerlege subkutane infusjonar i lindrande behandling er det angjeve at furosemid har blitt gitt i slike infusjonar til pasientar med avansert hjertesvikt, men det presiserast at dette er off-label-bruk. Det same oppslagsverket angjev at det fins stabilitetsdata på furosemid i kombinasjon med enkelte andre legemiddel som er brukt i subkutane smerteblandingar (2). Eit anna oppslagsverk (Palliative Care Formulary) anbefaler på generelt grunnlag at furosemid blir gitt åleine og ikkje blandast med andre legemiddel, grunna høg pH-verdi (3).

RELIS kjenner ikkje til om furosemid er vanleg brukt i subkutane infusjonspumper i Noreg. Subkutan administrering av furosemid er beskrive i fleire ulike internasjonale retningslinjer (4, 5).

Furosemid (Furix), morfin, haloperidol (Haldol), midazolam og glykopyrronium (Robinul) i subkutan smertepumpe
Fysikalsk-kjemisk forlikelegheit mellom dei ulike komponentane må alltid undersøkast for legemiddelblandingar som skal gjevast parenteralt. Dess fleire komponentar som vert tilsett i ei blanding, dess høgare er risikoen for uforlikelegheiter. Kompetansesenter i lindrande behandling angjev at det ikkje er anbefalt å blande fleire enn to til tre legemiddel i same blanding til bruk i subkutan infusjonspumpe (6). Farmasøyt kan kontaktast for råd om fysikalsk-kjemisk forlikelegheit av legemiddel.

Fysikalsk-kjemisk forlikelegheit av ei blanding med furosemid, morfin, haloperidol, midazolam og glykopyrronium er ikkje undersøkt i kjeldene vi har tilgong til (2, 7). Det er derimot beskrive kjent uforlikelegheit mellom fleire av enkeltkomponentane; furosemid+glykopyrronium (7), furosemid+haloperidol (7), furosemid+midazolam (3), og ein har sett utfellingar i slike blandingar. I tillegg er det stor skilnad i pH mellom furosemid (pH 8-9,3) og dei andre komponentane i blandinga (pH range ca. 2-4,5) (7), noko som gjer at vi også frå eit teoretisk perspektiv vil forvente at blandinga er fysikalsk-kjemisk uforlikeleg. Vi vil fraråde at furosemid blir tilsett i ei slik blanding som det er spurt om.

Referenser:
  1. Statens legemiddelverk. Preparatomtale (SPC) Furix injeksjonsvæske. https://www.legemiddelsok.no/ (Sist oppdatert: 31. juli 2021).
  2. Dickman A, Schneider J. The Syringe Driver – Continpus subcutaneous infusions in pallative care. 4th edition. ISBN 978-0-19-873372-0. (Publisert: 2016).
  3. Farmasøyt. Sjukehusapoteket i Bergen/Kompetansesenter i lindrande behandling, Helseregion Vest, pers.medd. 15. februar 2023.
  4. NHS University Hospitals Sussex. Guideline for the use of subcutaneous furosemide in end stage heart failure. https://www.bsuh.nhs.uk/ (Sist oppdatert: August 2021).
  5. NSW South Eastern Sydney Local Health District. Subcutaneous furosemide (frusemide) for end stage heart failure with fluid overload in the dying patient. https://www.seslhd.health.nsw.gov.au/ (Sist oppdatert: 5. november 2020).
  6. Helse Bergen. Kompetansesenter i lindrande behandling, Helseregion Vest. Legemiddel i blanding til bruk i subkutan infusjonspumpe. https://helse-bergen.no/seksjon/KLB/ (Sist oppdatert: Januar 2022).
  7. Micromedex® 2.0 (online). IV Compatibility. https://www.helsebiblioteket.no/ (Søk: 6. februar 2023).